នៅក្នុងសារមួយ ដែលលោកបានថ្លែងនៅក្នុង ទិវាសង្គមព័ត៌មាននិងទូរគមនាគមន៍ពិភពលោក លោក បាន គីមូនបានជំរុញ អ្នកបង្កើតគោលនយោបាយទាំងអស់នៅក្នុងពិភពលោក ឲ្យខិតខំប្រឺងប្រែងបន្ថែមទៀត ដើម្បីធានាឲ្យបានថា បណ្ដាសហគមន៍នៅតាមតំបន់ជនបទ អាចមានលទ្ធភាពប្រើប្រាស់ជាប្រយោជន៍នូវបច្ចេកវិទ្យាថ្មីបំផុតនេះ និងមិនឲ្យសហគមន៍ទាំងនោះធ្លាក់ខ្លួនជាជនរងគ្រោះដោយសារបច្ចេកវិទ្យាអេឡិចត្រូនិក ដែលអាចធ្វើឲ្យមានគម្លាតពីគ្នារវាងអ្នកមាននិងអ្នកក្រទេ។
លោក បាន គីមូន មានប្រសាសន៍ថា៖ "នៅពេលដែលយើងបានបំពេញគម្លាតប្រព័ន្ធបច្ចេកវិទ្យាអេឡិចត្រូនិក ពេលនោះយើងធ្វើឲ្យគម្លាតដែលញែកភាពខុសគ្នារវាងអ្នកដែលអាចនិងអ្នកដែលមិនអាចមានលទ្ធភាពប្រើប្រាស់ព័ត៌មាន និងចំណេះដឹង ដែលជាមធ្យោបាយពង្រីកឱកាសនានាដើម្បីធ្វើឲ្យជីវភាពរស់នៅមានភាពកាន់តែល្អប្រសើរ"។
ដោយនិយាយសំដៅដល់គោលដៅសង្គមកិច្ច និងសេដ្ឋកិច្ចដែលអ្នកដឹកនាំធំៗនៅក្នុងពិភពលោកបានសន្យាព្យាយាមសម្រេចនៅត្រឹមឆ្នាំ២០១៥នោះ លោកបាន គីមូន មានប្រសាសន៍បន្ថែមទៀតថា "ការប្រើប្រាស់កាន់តែច្រើន មានន័យថា យើងសម្រេចគោលដៅសហសវត្សរ៍កាន់តែឆាប់។
“នេះមានន័យថា មានប្រជាជនក្រីក្រ និងអត់ឃ្លាតកាន់តែតិច ព្រមទាំងមាននិរន្តរភាពផ្នែកបរិស្ថានកាន់តែច្រើន ព្រមទាំងប្រែក្លាយទៅជាមានសមភាព និងអំណាច (សេដ្ឋកិច្ច សង្គមកិច្ច និងនយោបាយ) សម្រាប់ស្ត្រី និងប្រជាជនទន់ខ្សោយកាន់តែធំធេង"។
ប្រធានបទនៃ ទិវាសង្គមព័ត៌មាននិងទូរគមនាគមន៍ពិភពលោកសម្រាប់ឆ្នាំនេះគឺ "ជីវភាពរបស់ប្រជាជននៅតាមតំបន់ជនបទកាន់តែប្រសើរដោយប្រើប្រាស់ ICTs”។ ចំណែកឯលោក បាន គីមូន បានកត់សម្គាល់នៅក្នុងសាររបស់លោកថា ជីវិតរបស់ប្រជាជនក្រីក្រនៅតាមតំបន់ជនបទដែលមានចំនួនប៉ាន់ស្មាន ១,៤ ពាន់លាននាក់នៅទូទាំងពិភពលោកអាចត្រូវបានផ្លាស់ប្ដូរជីវភាពដោយ បច្ចេកវិទ្យា ព័ត៌មាន គមនាគមន៍។
លោកមានប្រសាសន៍ថា ទូរគមនាគមន៍ដែលតភ្ជាប់អ៊ីនធើរណិតល្បឿនលឿន (broadband telecommunication) អាចមានលទ្ធភាពបញ្ជូនព័ត៌មានសំខាន់ៗទៅដល់តំបន់ដាច់ស្រយាលនៅជនបទ, អាចមានលទ្ធភាពសម្របសម្រួលពាណិជ្ជកម្ម, អាចបើកឲ្យប្រើប្រាស់សេវាកម្មថែទាំសុខភាពនិងអប់រំ និងអាចផ្ដល់ឱកាសដល់ប្រជាជនដែលមានវប្បធម៌ និងសាវតាផ្សេងៗអាចជួបជុំគ្នានិងធ្វើការជាមួយគ្នាបាន។
ទន្ទឹមគ្នានេះដែរ លោក Tarja Halonen ប្រធានាធិបតីប្រទេសហ្វាំងឡង់, លោក Sam Pitroda អ្នករកឃើញបច្ចេកវិទ្យាទូរគមនាគមន៍ឥណ្ឌា, និង Kristin Peterson សហស្ថាបនិក និងជាប្រធានប្រតិបត្តិរបស់ Inveneo ដែលជាសហគ្រាស ICTs មិនស្វែងរកប្រាក់ចំណេញ សុទ្ធតែទទួលបានរង្វាន់ជាកិត្តិយស នៅថ្ងៃនេះសម្រាប់សង្គមព័ត៌មាននិងទូរគមនាគមន៍ពិភពលោក នៅក្នុងឆ្នាំនេះ។
Hamdoun Toure បានកោតសរសើរដល់អ្នកទទួលបានរង្វាន់កិត្តិយសទាំងអស់ដែលបានចំណាយកម្លាំងកាយចិត្តក្នុងការជំរុញ និងលើកកម្ពស់ ICTs ឲ្យទៅជាមធ្យោបាយក្នុងការធ្វើឲ្យជីវភាពរស់នៅរបស់ប្រជាជនកាន់តែល្អប្រសើរ ជាពិសេសជីវភាពរបស់ប្រជាជនក្រីក្រនៅតាមសហគមន៍តំបន់ដាច់ស្រយាល។
